A representante do Concello de Santiago, Carmen Casado, trasladoulles que “Santiago é cidade de acollida de proxectos” e que aposten por crear proxectos en territorios onde poidan facer vida e negocio “proxectos vinculados á contorna e á poboación”.
Desde o ámbito universitario, a responsable do programa Woman Emprende, Eva López, incidiu en que levan anos traballando o emprendemento desde a universidade e que “proxectos con liderado feminista, que beben do modelo da economía social, deben ser coñecidos”. López destacou que as emprendedoras “tedes que ser exemplo para as novas xeracións” e que “os valores do feminismo axudarán a cambiar o paradigma actual”.
A directora xeral de Emprendemento e Apoio ao Emprego, Margarita Ardao, quixo trasladar a súa felicitación ás emprendedoras porque “o emprendemento é unha forma interesante de xerar emprego” incidindo en que “desde a administración queremos levar ao territorio programas como este, para fomentar o emprendemento como unha forma de xerar emprego ligada ao territorio”. Tamén lles lembrou ás participantes do Olympe Emprende que “hai ferramentas á vosa disposición desde diferentes administracións e institucións”, animándoas a “trasladar ás administracións as vosas necesidades para que vos podamos axudar pero tamén para que podamos mellorar para acompañarvos”.
“Se podedes, apoiade proxectos de economía social en colectivo, porque son máis resistentes, máis enriquecedores e máis plurais”, animou Antón Insua. O representante en Galicia de Coop 57 compartiu coas emprendedoras a necesidade de xerar proxectos que sirvan non só para as promotoras senón tamén para o territorio e a xente. “Sede auténticas, facede o que vos guste e para o que vos sintades preparadas. Apostade por intercooperar, a suma sempre é positiva”.
Na súa interlocución coas representantes da administración, as emprendedoras solicitaron apoios e a simplificación burocrática, así como unha mellor xestión da información sobre emprendemento e economía social.
Entrega de premios
O xurado desta segunda edición, conformado por Veronica Méndez , xestora de proxectos na federación de cooperativas de traballo de Cataluña; David Pérez Merchán, representante da cooperativa Baraca; Ana Galán, cofundadora e directora creativa da cooperativa The Geco Company; Carme Casado, responsable de Desenvolvemento Económico, Oficiña de Promoción Económica do Concello de Santiago de Compostela; e Eva López Barrio, responsable do Programa Woman Emprende da Universidade de Santiago de Compostela (USC); destacou a calidade dos proxectos presentados e o alto nivel das propostas.
O primeiro premio, cunha dotación de 1.200 €, recaeu na consultoría social, Atoupa, formada por emprendedoras de Láncara e Vilalba; e o segundo premio, cunha dotación de 1.000 €, foi para o proxecto de turismo ecosostenible, Cuarzo Verde, de Vigo. Dúas iniciativas cooperativas que están a dar os seus primeiros pasos.
A entrega de diplomas correu a cargo da directora xeral de Emprendemento e Apoio ao Emprego, Margarita Ardao; a responsable de Desenvolvemento Económico, Oficiña de Promoción Económica do Concello de Santiago de Compostela; Carme Casado, e a responsable do Programa Woman Emprende da Universidade de Santiago de Compostela, Eva López Barrio. Estas tres representantes institucionais incidiron na importancia da economía social para Galicia e as razóns polas que debe ser unha aposta de futuro porque é solidaria antepoñendo os beneficios sociais e colectivos á rendibilidade financeira; porque se compromete coa súa contorna; porque axuda a fixar poboación no medio rural, creando actividade económica e ofrecendo servizos; tamén xera emprego estable, de calidade e resistente á crise; e serve para loitar contra as desigualdades favorecendo a redistribución de recursos.